太安樓

「你住太安樓?你就好啦可以掃街!」(附華記士多蛋包飯分享)

星期三, 6月 07, 2017,0 Comments


「你住太安樓?你就好啦,可以日日掃街!」

家住太安樓嘅朋友,幾乎都聽過朋友說這句話。
對於由小住到大,住了廿幾年的我來說:

「其實無你想像中咁好囉。」

太安樓被喻為掃街聖地之一,好多年前已經好出名。
不過早年的太安樓,對住客來簡直係「仙境」。
以前,太安樓掃街並唔係好似依家咁,一間一間食物檔入晒舖。
而係一架又一架好原始的木頭車小販。


  P.S. 本文章不是食評,只是生活分享  

講歷史 ...

以前衛生意識又無依家好。
油煙飄逸,成個地下商場好似仙境咁。
滿地油漬,真係要學識飄先至唔會仆親。
間唔中呢,仲會比百幾度嘅滾油彈到起水泡。
之後仲會有遺留嘅衛生問題。

你唔係住哩度,買完鬆,當然好過癮。
日日住喺度嘅,就唔係咁諗。

唔係唔支持小販。
老實講,佢哋自力更生,點都好過問政府拎錢。
我好熟嘅鄰居,就係靠一架鐵皮木頭車養大一家人。
不過無論如何,衛生安全係居民嘅底線。
相信商場裡面真金白銀比租嘅租戶,亦會投訴唔公道。

當時太安樓個情況好惡劣。
佢有個「朵」,但唔係咩掃街天堂,而係「東區毒瘤」。
因為地點係私人物業,警察等部門理唔到,但私人管理公司又搞唔掂。
係一個「三不管地帶」。
總之就烏煙瘴氣,連帶品流複雜、黃毒等問題。
係,我細細個成日喺大廈流連,針筒咸書係隨處可見。

後來,都唔記得係咩時候啦,發生咗流血事件。
原來,政府部門終於肯進行聯合執法行動,
驅趕、檢控大廈內的無牌熟食小販。
那天我放學,因為讀下晝班,哩個時間本應係小販開始活躍嘅時間。
但係我返到去,個商場比平日靜,仲多咗一班執法人員。
有一位小販阿叔跪喺地上流緊血,相信係反抗時受傷。

自此,班小販大部分都繼續營業。
唔同嘅係,佢地入咗舖,相信亦都領咗牌照。
慢慢演變成今日嘅環境。
依家嘅牛雜佬、魚蛋佬等等,都係當日嘅小販,可以話歷史悠久。
我鄰居嘅粥店亦入咗舖,後來頂咗比依家嘅新利記。

「環境好咗,咁你可以好開心咁掃街啦!」




回到現在式 ...

我不知道其他人的情況,但至少我笨唔係咁樣 (哭)。
其實住喺太安樓嘅年青人,放學、放工返到屋企,
都差唔多時間食媽媽煮嘅飯,
而我又係個比較節制嘅細路,一個月都唔會飲一罐汽水,
加上家境唔係好好,邊有咁多空間買「立雜嘢」食?

食,就好多都食過。
但唔係真係成日食到。

何況,我覺得太安樓雖然好多「掃街」選擇,
但真係好食到上癮,Encore 又 Encore 並唔係咁多。
又或者小時了了 (指本人),大未必佳 (亦係指本人)。
屬於食得開心、食得平之選。

加上兩年前搬咗,
就更加少機會食到太安樓嘅小食。
而且哩幾年,食店轉得好似特別快,開咗好多新店。
連長洲糯米糍都有。
係咪經營環境困難咗?我就冇深究。
所以各位朋友,千祈唔好再問我太安樓有咩好食
因為好多我都冇試過,亦唔知心水選擇有冇走樣。

真係要講,就只能講吓老餅嘢。
魚蛋佬 (又名沙嗲佬)、牛雜佬至今仍然值得試嘅。
但真係唔好抱咁大期望。

雞蛋仔呢,
蘇絲黃推薦嘅蛋記,好耐之前已經覺得普普通通,所以好耐冇試。
但佢後來都推出咗芝士等等新口味,唔知有冇改善。


另一間鴻記雞蛋仔曾經係我推介嘅愛店之一。
不過後來水準亦都跌咗,或者話冇咁穩定。
間店亦因為推出反佔中優惠而出名,近兩年水準我真係唔知喇。



近期比較鍾意嘅係+5C手抓餅
外層鬆脆,內層軟糯,可自選餡料。



要比就比唔上台灣名店,價錢亦唔算平,但就香港來講水準算唔錯。
另一缺點係製作需時,請預留時間等候。
亦試過鹽酥雞扒,但覺得唔夠味。



炒麵店嘅鑊氣真係一流,雖然比較油但夠晒惹味。
以前成日賣,但後來係咁加價就食少咗。

其他諸如魚蛋燒賣炸物店,哩類大路嘢好少會伏,OK 啦咁囉。
只係嫌炸物店太多人,要花時間等。

要數近來最紅,或者係我覺得最正嘅西灣河美食,
就唔可以唔提華記士多嘅咖哩蛋包飯。
不過間舖唔喺太安樓裡面,而係距離兩條街咁上下嘅小店。
哩間嘢初初只係做日頭,賣晒就冇,就算住西灣河,放工時都收咗舖啦。

「再次證明,住太安樓唔係真係咁好咋。」

聽講最近華記做埋晚市,但搬咗之後難得返來,
通常都係陪屋企人食飯,無第二個胃再食蛋包飯。
反而附近返工返學嘅朋友仔更有口福。



間舖喺一條橫街嘅後巷,
客人就係坐喺條後巷食嘢,所以夏天一定比較易食到。
第一次試,真係有驚喜嘅感覺。





嫩滑又份量足嘅咖哩,呈半流心狀態。香甜帶半分辣嘅日式咖哩就滿到漏。
加上均勻著色嘅醬油雞肉炒飯底,真係好正!
而且HK$35包汽水凍飲,芝士蛋包飯就要比多 5 蚊。
街坊價來計真係超水準,無得彈。



杯凍奶茶亦絕對唔失禮!



雖然 (難得有機會) 第二次幫襯時,個炒飯比較乾身冇第一次咁好,
但依然係好食又抵食嘅。


華記士多地址:
西灣河筲箕灣道48號地下3B號



P.S. 不過,我真係幾鍾意西灣河哩個地方。
近海,多公園又多綠化地,附近樓宇又唔高。
(填海起咗嘉享灣嗰堆高樓,真係格格王入)
西至太古城康怡睇戲購物,東至筲箕灣東大街繼續食。
環境好又方便。

By Simon

You Might Also Like

0 意見: