中國

世博排隊建議

星期六, 8月 07, 2010,0 Comments

自從我的南京蘇州上海行結束之後,一直懶寫遊記,終於俾人催我喇,催到我都唔好意思,於是疊定心水,決定動工。

由於唔少朋友打算暑假去上海世博,所以我先總結一下進入世博各個場館的排隊心得,希望對大家有用。


基本上,去世博已經同排隊掛鉤,任何人第一時間都必定聯想到那漫長無邊的人龍,想入國家館,閒閒地三十分鐘一定唔少得,多則四、五個鐘都夠膽死。






老老實實,當我親身進入世博園區,頂著三十度以上的烈日,再望望無邊際的排隊長龍,恐怖、痴線呢類形容詞都唔足以表達那一刻的心情,面對長龍、打尖、推撞、酷熱,你一定唔止會想講粗口,出手打人都絕對有理由。

講左咁耐世博排隊的恐怖情況,係時間要講下我呢個懶人係幾日內結合個人經驗、與hostel內世博排隊達人的經驗,所得出的入館快速方法。


口口口口口最熱門的場館口口口口口

出發前的第一步,相個每個人都會plan定自己的必入館。不過現實同理想好多時都並存唔到,如果你的必入館要排成五個鐘,你入定唔入呢?不如我地先了解一下,有邊幾個館係排最耐,以便你分配時間,同埋有心理準備。

最長龍館:德國館、日本館、沙特館、日本產業館。
長龍館:法國館、意大利館、英國館、瑞士館、西班牙館、韓國館。
特別館:中國館 (會另外開一篇特別介紹)


口口口口口排隊建議口口口口口

成個世博以最長龍館最難入,想入呢類館,如果唔想無左半日,就一定要一早起身,係開館時的一刻直衝到目的地,跑慢少少,分分鐘都要排一個鐘。不過有時好彩,係中午或傍晚用兩、三個鐘都入到,但要講彩數。

而長龍館,建議唔好中午去,因為晚上八點過後,旅行團開始離場、唔少遊客中午時已經去左,所以夜晚基本上二十分鐘左右就入到,咁可以節省唔少時間。


個人建議:

抽一日在早上七點前到場,待九點入場,取得中國館預約證後,立即跑到其中一個最長龍館。

參觀完後,可視體力再排一個人龍較少的國家館,然後食飯,午休。呢個時候,可以用手機預約芬蘭館的入館時間。

食完飯,呢個時間係最曬最熱,建議行行無人排隊的主題館、城市案例館,又可以順手收集三個西班牙城市的印章(集齊三個印可用特快通道入西班牙館,而且唔需要即日入,留返第二日用都得,教學方法另外補充)。

之後再按預定時間參觀芬蘭館同中國館。完成後,可食晚飯,順便睇下世博夜景。到晚上八、九點後,可以參觀一至兩個長龍館,呢個時候多數唔使點排除。

用以上方法,就可以有效咁利用一日,仲入到中國館以及幾個國家館,但過程唔會太辛苦,唯一比較辛苦的係要早醒,同埋要等世博開門的兩小時。



P.S.
以上資料由ANNA犧牲了專心食早餐的時間打出來,歡迎轉載,但請註明出處喔,謝謝。

資料來源:安娜愛閒遊 http://hk.myblog.yahoo.com/anna-cat

You Might Also Like

0 意見: