中環

消失的蛇竇

星期二, 12月 30, 2008,0 Comments

屹立係中環威靈頓街將近二十年的樂香園係今日結業。

由於工作關係,常常穿梭於中環,被呢間舊式茶餐餐的懷舊氣氛吸引,於是佢成為我的蛇王地點之一。



三蚊一個菠蘿包,加多兩蚊就可以升級做菠蘿油,十二蚊一杯奶茶,如果唔夠飽,可以試下二十二蚊的茶餐,餐廳內的駐場貓小姐,偶爾會出黎露個面。該店的伙記亦相當有趣,對答當中常常出人意表,令我覺得呢度應該係一個充滿人情味的地方。





由於價錢合理,水準唔錯,所以吸引大批中環客於下午茶時分到來打躉,久而久之,樂香園又有「蛇竇」之稱。

最喜歡佢的菠蘿油,每逢三點半左右,總會見到大批食客係度等出爐的菠蘿包、雜批同雞批。

不過係近年中環的名店效應下,該地段成為品牌服飾的兵家之地,連帶鋪租都被推高,每月租金十三萬的樂香園,最後當然敵唔過俾得起每月四十萬租金的時裝店,不過我相信佢絕對可以東山再起,畢竟係金融風暴下,中環租金急跌,所以要另覓鋪位並非難事,「蛇竇」只係暫時消失,等佢重新開業時,我一定會繼續支持。



後記

新店地址:中環機利文新街8-12號地下

You Might Also Like

0 意見: